مسلسل النحس

[Mohammed]

مسلسل النحس سلسلة أضعها على بروفايلي على الفيسبوك. قراءة ممتعة

[Mohammed]

سؤال فضولي:
الطبيب اللي راحعته ذات مرة فقال ما بيعرف واتصل بالصيدلية وأخذ مشورته وكتبلي الفيتامين د على أساس رأي الصيدلي وبعد هيك أخذ ١٥ دينار
هذا الطبيب مشارك بالاحتجاجات؟

الطبيب اللي فحص اذني بجهاز عادي جداً وما عرف ايش في عندي وأخذ ٣٥ دينار هذا كمان مشارك؟

المحامي اللي أسقط قضايا أخوي دون علمه وأقنعنا انو ربح القضايا وبعد سنوات من المرمطة خرب بيتنا يا ترى هذا مشارك بالاحتجاجات؟

القائمة عندي طويلة من مهنيين فاسدين في التعامل مع البشر فإذا كانوا من المحتجين يا ريت ينظفوا حالهم أول قبل ما يحكو عن الفساد والمفسدين

[Mohammed]

وبعدين مع النحس اللي ملازمني مو راضي يحل عني لا بحلال ولا بحرام
شوف يا سيد نحس: ما مليت؟ ما زهقت؟ ايمتى بدك تحل عني؟ ما في غيري تروح تشوفه؟ تارك الدنيا ولزقان فيني؟

[Mohammed]

23 حزيران 2018

يعني رحت اعمل امتحان انجليزي بشبه التوفل بعرف الاجوبة بدون ما اشوف الاسئلة لاني كنت بزماني احط اسئلة وبعرف شكل الاجابات الغلط كيف بتكون
ويعني انا عم بقدم لماجستير لغويات مشان بلكي اقدر بعده اسجل دكتوراه لغويات
ويعني انا معي ماجستير ترجمة والاول على دفعتي وخبرة عشرين سنة وخمسة ابحاث في مجلات محكمة وحدة منهم دولية حاصلة على نقطتين وفق نظام الحامعة الاردنية
ويعني قبل عشر سنوات سجلت دكتوراه في امريكا وحصلت على بعثة بس ما لقيت كفيل

ولما بجي اتقدم لوظيفة في جامعة حكومية او بعثة دكتوراه بيقولولي ممنوع لان معدلي في الثانوية العامة قليل
قالولي روح اعمل توجيهي جديد منقبلك
ويعني لما احصل على وظيفة في الخليج ولا في الاحلام ويبعتولي العقد والفيزا وبعدها يقولو حهز حالك للسفر وبعدها بيقولو اسفين عملنا اعادة هيكلة

ولما بعمل ستين مليون دورة قواعد توفل وما حدا بيسجل فيها وبالاخير بكتشف انو نص المتقدمين للماجستير ببحثوا عن هاي الدورات وما بلاقوها

ولما اسوق سيارتي بسرعة واحد وسبعين في شارع سرعته تمانين ويخالفوني كاميرا على اساس السرعة ستين

ومخالفة ثانية في العقبة مع انو ما عمري رحتلها بالسيارة
ولما ضريبة الدخل بيقولولي عندي بيت مستثمره وبتهرب من الضريبة وانا لا املك شيء

بعد هذا الكلام فيكم تقولولي في حدا منحوس اكتر مني
بدي افهم هذا النحس مو ملاقي غيري؟ عن جد يعني ما زهق؟

ملحوظة : على ذكر النحس وجالب النحس ايش أخبار اللقلوق؟

[Mohammed]

24 حزيران 2018

في كل مرة أتقدم فيها لشغلة بشي جامعة بطلبوا مني تصديق شهادة الثانوية العامة.
للعلم بس أنا درست في سوريا ونظام سوريا في الثانوية العامة م بس قوي إنما بيعطي فرص كثيرة للطلاب وبسهل عليهم كتير وأنا دخلت الأدب الإنجليزي على معدل المادة مو معدل السنة.

هلأ عندي علاماتي كلها تقريباً على الحفة إلا شوي. وحتى أكون صادق معكم علامتي بالإنجليزي كانت 27 من 30 بس كنت راسب بمادتين
الأولى علامتي 1 من 20 (واحد من غشرين)
والثانية 11 من 30

وباقي المواد عل حفة...

هلأ مشان مسلسل النحس يكمل، كل ما أروح على وزارة مشان يصدقوللي الشهادة في جبل الويبدة بجبروني أعبي استمارة مشان بدهم يبعتوا شهادتي الثانوية لمصدرها ويتأكوا أنو مو مزورة... وعبثاً بحاول أحكيلهم يا عمي أنا مو فارقة معي بس مو منطقي أنكم تعملوا هاي الحركة كل مرة وبعدين لو بدي أزور شهادة ثانوية بكون صدقاً ستين حمار إذا حطيت لحالي علامة 1 من عشرين في مادة و11 من 30 في مادة ثانية.

[Mohammed]

24 حزيران 2018

لغيت شغلي هذا الأسبوع مشان فيه شركة خارج الأردن بدهم ياني أسافر لعندهم أعمل مقابلة. اليوم حكولي أجّلوا الموضوع وراح شغلي عل فاضي...

مسلسل النحس مستمر لكن هذه المرة #نحس_عابر_للحدود

[Mohammed]

Mohammed Yahya Abu Risha

June 25 at 7:57 PM ·

#مسلسل_النحس
بتدخل الجامعة وأنت متخيل انك صرت سوبر مان عنده طموح بيطيرو فيه للسما وتتفاجأ انو ما حدا معبرك وبعد فترة بتصير تتأقلم وتنحت وتدرس وتتحمل غلاظة البني ادمين اللي حواليك وبعد تعب كبير وبهدلة وكبكبة مصاري بتتخرج.

وقت التخرج بتصير متل طرزان عندك طاقة بتنط من شجرة لشجرة وبتقول انا رجل المهمة الصعبة وبدي اعمل واغير وبتصير تتخيل البساط الاحمر اللي سوق العمل رح يمدو الك او بالاحرى تحت رجليك.

وبترسم في مخيلتك الشركات والمقابلات وكيف انت بتختار وكيف اصحاب العمل بتقاتلو عليك

وبعد ما تروح اول مقابلة وتشوف الناس بتتدافش بالايدين وبتتسابق بالنفاق والواسطة بيصير شكلك متل جيري لما يضربو لتوم ستين كف مشان يصحا من السكرة.

ولما ييجي دورك في المقابلة بيطلع عليك المدير ابو منقار وبيقولك انت ما عندك خبرة ما بتلزمنا اللي بعدوووو

ولساتك ما صحيت من احلامك فبتابع البحث وبتلاقي شركة تانية بس المدير بيقولك ضاحكاً انك ما فقست من البيضة وانو كل اللي تعلمته في الدراسة علك مصدي ومهما حاولت تحكيله وتشرحلوا عل فاضي وبالنهاية بيفتحلك كاظوظة وبيقطعلك كرت

هلأ وقتها صارت نجوم الظهر تلمع وابيضت الدنيا وظهر في البياض طرزان واقف بابتسامة بلهاء عاري باستثناء ورقة خوخ من قدام وورقة توت من ورا

بتصير تطلب نصائح بس ما في فايدة ولما بدهم اصحاب العمل يخلصوا منك بيقولولك خود دورات

هلأ من ناحية تلاقي شغل بتلاقي بس شغلة ما بتعبي العين براتب شهري يا دوب يكفي مصروف الشبس لابن صاحب الشغل

المهم بتاخد دورات وبتنط متل القرد من مكان لمكان وبتتنقل من شغل لشغل متل سندباد
وبتكبر السي في بتصير شي سطعش صفحة

ولما بتقدم للوظيفة اللي بتحلم فيها بيقولولك انت مكانتك كبيرة ويا ريت لو عرفوك من زمان بس اسفين لانك اوفير كواليفايد

هاي العبارة بالانجليزي حتى تتذكر كيف تعلمت اول احرف الانجليزي في الصف اللي احد اتيس الطلاب فيه هو صاحب شركة الاوفير كواليفايد الان

واولاد صفك الكسلانين توفقوا بالحصول على واسطة وهيهم دكاترة جامعات اد الدنيا
وانت متل ما انت اذا عشت فانت مجرد زيادة عدد
وان متت فبالناقص

حتى فلسفة عيش يا كديش لينبت الحشيش ما رح تنطبق عليك مو لانك مانك كديش بس لانو ما معك مصاري حق الحشيش

حلقة نحس اليوم بعنوان
#احترنا_يا_قرعة_من_وين_نبوسك

[Mohammed]

Mohammed Yahya Abu Risha

June 25 at 8:30 PM ·

شو مالك عل فيسبوك هل يومين حردان مدري زعلان الخ؟

يا اخ يا سيد يا سيدي ستي منداري مين هادا اسموه بروفايل مخصص مشان الواحد ايش في براسوه يحطه على هل صفحة مو مشان يفتح نقاش بيزنطي في العالم الحقيقي

#عايف_التَكَنَة

يا ريت ما حدا يقلي في خطأ املائي
لما بتكون امورك منيحة فانت عايف التنكة
بس لما بتكون فاقعة معاك بتكون عايف التكنة تاء كاف نون تاء
#علم_النحو_التراللي

[Mohammed]

Mohammed Yahya Abu Risha

June 25 at 11:05 PM ·

فاصل ونواصل:
فاصل دعائي لمسلسل النحس...

في رسالة أجتني من صديق إلي بالأول فكّرتها فعلاً منه وبعدين عرفت أنو واحد هاكر قلت أتسلى معه بس إبن الحرام طلع قاعد يعمل رسائلي في غوغل وفاهم إيش أنا عم بحكيلوه فقلت خلينا أتفذلك فدخل صاحبنا الهاكربالحيط.... إليكم الحوار:

Hello,
Please where are you at the moment? I need you to do me a favor. Kindly get back to me as soon as you get this.

الأستاذ الكريم عبد الله

أرجو أن تكونوا والعائلة الكريمة بخير.

معلومات التواصل معي لم تتغير:

مع التحية الاحترام

Good to hear from you. I had to rush out of town to help my wife who suddenly fell ill on her trip to Paris, France and was diagnosed of colon cancer. The news came as an emergency and the hospital needs some amount of money to carry out a bowel surgery as soon as possible.
I never expected things to be this way which is why I need your help with a short term loan to cover the balance required. I promise to pay back immediately I return in about a week.
I trust you to be able to help and please remember this has to do with my family so it must be kept private.

بعتله : Sorry to hear that! How much do you need?
I need 3,650 Euros but i will appreciate whatever amount you can come up with if not all. Please let me know and i will refund once i get back next week.

بعتله: استاذي مش فاهم عليك بسس يا ريت تحدد الطريقة اللي بدك تقدر تسدلي المبلغ بعد ما ترجع

بس ابن الحرام فهم ايش قلتله فبعتلي
I will definitely refund once i get back next week like i said earlier. So are you willing to help me? let me know
قتلتله
ماشي تكرم

بكرة ببعتلك المصريات على الويسترن

هون دخل الهاكر بالحيط
Look, this is a matter of life and death and I guess you don't want to help me well it's fine. I will look for help elsewhere

قلتله
ما لك يا زلمة حكنالك عين خير أنت غالي واحنا منوقف معك
بعدين ليش عمتكتب الإنجليزي؟ ويش السالفة

فرد علي:
Look, this is a matter of life and death and I guess you don't want to help me well it's fine. I will look for help elsewhere

فرديت عليه:
لا حول ولا قوة إلا بالله

لويش الزعل؟ قلتلك أنا رقتبي سدادة!!! مالك بكرة غاد من صباحية ربنا منبنتعتلك مصراتك

أحلى شي أنو غوغل بيعطي لترجمة الأخيرة كما يلي:
What is your name? I told you I'm a stopper plug !!! The owner of Bakr Ghad from the morning of our Lord

????????????????????????????

[Mohammed]

Mohammed Yahya Abu Risha

June 26 at 11:07 PM ·

نواصل مسلسل النحس:

النفاق الاجتماعي والتسلق:
في مرحلة من حياة البني آدم اللي متلنا وعادة ما يكون ذلك في سن 20 إلى 39، بتكون بمواقف دائماً أنت على حق واللي حواليك بتشعر أنهم على غلط. وبتتمسك بمبادئك وبنخسر كتير أشياء. هلأ اللي حواليك في منهم مؤثرين ومهمين بحتاجو للنفاق أو هز الدنب أو تمشي معهم من مبدأ وما أنا إلا من غزية إن غوت غويت وإن ترشد غزية أرشدِ.. وعادة مطلوب منك أنك تجاملهم وتمسح جوخ لحتى يعطوك تذكرة تسريع في صعود السلم الاجتماعي. وأنا ما بقصد المجاملة بكلمة أنا أقصد أنك لما تشوفهم بغلطوا لازم تقولهم أحسنتوا ولما يتكروعوا المشروب تتكروع معهم وتتسمخر على اللي بتسمخروا عليه وتمدح اللي بمدحوه حتى لو أنك ما عرفت سبب ذلك من مبدأ أقفل عقلك وحطه بالخزانة واتبعني وحكلي لحكلك.

هلأ بالعادة هدول الناس بنتظروا أنك تجامل وتنافق بس أنت صاحب مبدأ ما بتعملها.

قمة الألم، لما بعد سنوات وسنوات تجد نفسك أنك مقتنع أنو هز الدنب ومسح الجوخ شيء صحيح وممتاز ولازم تعملوه بس مو هون المشكلة. الألم الحقيقي لما ترجع للناس تهزرهم دنب يطلعوا عليك بنظرات معناها: ما عاد إلك لزوم... وهكذا بدل ما تطلع السلم بتصير تكسر السلم وتلعن أبو السلم على اللي حطه أصلاً وعلى الساعة الللي فكرت فيها تكون بني آدم تعتقد أنه من حقك تصعد السلم. ما رح تنسف مبادئك وتنحرف أبداً لأنه من شب علي شيء شاب عليه بس أيضاً لأنو ربنا بيثبّت الناس على الحق إذا صبروا... بس أنت رح تشعر بالكراهية والنقمة من كل شيء حوالك ومن كل بني آدم بتشوفه وبتكتشف أنو وصولي وأناني.

أنا ما بدي أعطي مواعظ وأقول اثبت على الحق الخ الخ الخ وما بدي أقول إنو الغلط ما بنتج عنه إلا غلط... ما بدي حدا يعتقد أني شيخ أو منظّر أو صاحب مبادئ وغير ذلك. ما بدي أقول بالمقابل جامل ويلعن أبو المبادئ. نقطة البحث مو هون.

اللي بدي أقوله أنو هذا اللي عم بحكيه واقع يعيشه الإنسان ولو درسناه منيح لعرفنا أسباب الأمراض النفسية اللي بعانوا منها البشر. والأهم من ذلك أنو نعرف تماماً أنو المجتمع الآن منقسم إلى قسمين ومافي إنسان إلا في فئة من الفئتين فإما أنه (((بني آدم))) أو (((مضاد البني آدم))).

من كل هل كلام اللي بقوله، فكّر كتير بأصحاب اللسان اللطيف وانظر في أحوالهم كيف تغيرت بالواسطة والمحسوبية والمجاملة والكذب والنفاق الخ والغريب بالأمر لسانهم ولا أحى وتواضعهم بخلي الواحد يدوب من الخجل. هدول هم مضاد البني آدمين اللي ما عدت أطيق خلقتهم ولا أسمع عنهم ولا أشوفهم أصلاً..

ملحوظة: في كتير ناس بحاولوا يتملقو ويجاملوا ويقضوا حياتهم بهاي المساخر بس لحسن حظهم أو سوء حظعم ما بطلعلهم شيء على الفاضي.. هدول الناس ما بشعرو بالإحباط لسبب بسيط أنهم: تمسحوا تماماً والبلادة جاثمة على قلوبهم والحيونة (he wa neh إذا ما انقرأت بالعربي هي حطيتها باللاتيني) تعمي ابصارهم.

[Mohammed]

Mohammed Yahya Abu Risha

June 29 at 7:56 PM ·

ليش لازم نسمع الراي الآخر؟
لأنَّ الرأي الآخر + رأيك = الصورة الحقيقية للموقف

مسرحية Glass Menagerie:
1- إذا قرأناها من وجهة نظر اجتماعية: فهي حديث عن أزمة مالية في أمريكا وآثارها في الناس والمجتمع والطبقة الوسطى والضغوط الاقتصادية وما يحدث عنها واستسلام البعض للظروف والأمل واليأس والحنين للماضي الجميل والشجاعة والثبات والإصرار.
2- إذا قرأناها من وجهة نظر نسوية فهي تتحدت عن تمكين المرأة دون وجود رجل وتتحدث عن أثر الرجل الموجود (الأخ) وهو أثر صفري تماماً وأثر الرجل المفقود (الأب الهارب) وهو أثر صفري أيضاً. ثم يأتي جيم من خارج البيت ويدخل حياة الأسرة ويغير مسار الفتاة الخجولة المستضعفة vulnerable لتبدأ مرحلة التمكين والخروج عن دائرة ال Passivness الخمول التي تعيش فيها والدتها. بهذه المقاربة تظهر الفروقات بين المتعارضات الثنائية من الخجل والشجاعة - الضعف والقوة - الأمل واليأس- وشخصية الفتاة المغلوب على أمرها مقابل الفتاة المُمكَّنة.
3- من الناحية العصبية النفسية: الأم لا تهرب من الواقع بالحنين للماضي والفتاة لا تتشبث بالتحف الزجاجية لأنها خجولة أو خائفة. الضغوطات كثيرة نفسياً والدماغ في الإنسان الطبيعي يفرز مادة معينة لتحقيق السعادة. هذه الضغوطات توقف هذه المادة فتسعى المرأة وكذلك الفتاة كل بطريقتها إلى إفراز هذه المادة مادة السعادة بأن تستدعي في الذاكرة الاشياء الجميلة التي تحافظ على تلك الإفرازات. إذن المرأة لا تهرب لمجرد الهرب. إنما تهرب للمحافظة على صحتها النفسية. جيم يأتي ويؤثر في الفتاة التي على ما يبدو ستغير طريقة تفكيرها وتواجه الواقع. فهل له الحق في ذلك؟ وهل تصرفه منطقي؟ وماذا لو تركها هكذا وقد توقفت إفرازات المادة السعيدة؟ الن يؤدي ذلك إلى وقوعها في الاكتئاب. وجهة النظر هذه أعتقد أنها ستؤدي إلى أنَّ جيم لم يفعل الشيء الذي يجب فعله.

4- ناحية الإعاقة: الفتاة معاقة جسدياً والأم كما يبدو لديها إعاقة ذهنية بسبب عيشها في الماضي. جيم يأتي لكي يبرهن أنَّ المجتمع هو المعيق للناس وأن ذوي الإعاقة يمكنهم أن يتغلبوا على إعاقتهم وأنَّه لا نبغي للمعاق أن يبقى ينظر لنفسه على أنه مغلوب على أمره Passive Victim بل هو قادر على فعل اشياء كثيرة.

[Mohammed]

Mohammed Yahya Abu Risha

June 30 at 1:20 AM ·

#ألغاز_شيش_بيش
المنطق بقول: إذا بدك مترجم ممتاز في السوق فهذا يتطلب:
تعيين مترجم خبير للتعليم في الجامعة

لغزنا الشيش بيشي اليوم انتحر بسببه آينشتاين ولما سمع فيه أفلاطون راح على مستشفى الأمراض النفسية على السريع:

في جامعاتنا راتب المدرس (رتبة ماجستير) حوالي 600 دينار بالشهر.????????????
والسؤال: كيف يمكن لجامعاتنا أنها تتوقع أنو المدرس الخبير اللي راتبه 600 دينار بالشهر يعلّم الترجمة لطلابه حتى يتخرجوا ويصيروا مترجمين يندفعلهم 150 دينار باليوم في الترجمة الفورية أو قرابة 70 ديناراً باليوم في الترجمة التحريرية؟؟؟ ????????

[Mohammed]

Mohammed Yahya Abu Risha

July 1 at 12:57 AM ·

مسلسل النحس:
عذراً منكم صرلي كم يوم والله مشغول جداً مو فاضي أحك راسي ولحيتي طولت وشعري صار مكنسة من الانشغال في ترجمة بعض الملفات فمشان هيك انقطع عنكم حلقات "مسلسل النحس" فما تآخذونا...????

في مَثَل بضربوه المسخمطين في التعبير عن سوء حظهم وعلى نحسهم فبقولوا: أنو لو واحد منهم حط إيده بسلة مليانة مصاري ???? وسحبها بتطلعه كمبيالة أو فاتورة كهربا غير مدفوعة

هلأ هذا بالذات صار معي بس بطريقة مختلفة...

بعد ما فقدت الأمل ذات مرة من أنو في إمكانية نعقد دورات في الترجمة على الإنترنت???? شجعني بعض الشباب أني أحط إعلان من جديد وفعلاً قلت يا ولد ايش ناقصك إيد ولا إجر؟ روح حط إعلان. حطيت إعلان عن الدورة وحكيت عن الترجمة...????

أجاني طلب من بين الطلبات رداً على الإعلان من واحد بيقول أنو مسجل في الجامعة بس ما معو مصاري يكمل وبدو ياني أغطيله رسوم الجامعة...

هذا الطلب غريب لأني ما عمري اقتنعت بفكرة الواحد يمد إيدو للناس أبداً. بس من جهتي بدو هذا الشخص الطالب للمصاري يستنى علي شوي لبين ما النحس ياخد إجازة يومين تلاتة بلكي أستغل الفرصة ويصير معي شوال مصاري مش بغطيلو رسوم الدراسة فقط بل بغطيله ديون أهله وحارته إن شاء الله.

[Mohammed]

(((فاصل ونواصل)))
حلو الواحد هيك يشطح بخياله شوي. يعني خلينا نقول أنو مسلسل النحس تبعي هذا صار فيه شيء ممتع وفجأة كترت المشاركات وصار الكل يحكي عنه وصار المسلسل مسلسل معروف على المستوى الإقليمي والدولي والكوني (خارج المجموعة الشمسية) ولنفرض أنه صارت الناس تحكي عنه... يمكن في أمل بعد هل حكي هذا أنو نوعاً ما ينقلب النحس لحظ حلو...

بس عن جد هذا اللي صار في النكتة اللي بتقول كان في واحد منحوس صاحبه مسعود خلصوا توجيهي المنحوس على الحفة نجح والمسعود أخد علامة كاملة. افترقوا بس قالوا خلينا نلتقي مرة وحدة بالسنة عند بيت المنحوس....

السنة 1: المسعود شاف المنحوس في بيته... المسعود قالوا أنو بدأ يدرس الجامعة..
المنحوس: اللي بشتغل فيه بشرب فيه (يعني مشروبات كحولية سم الهاري على قلبه ان شاء الله.. بس هيك أجت النكتة)

السنة 4: المسعود: انا تخرجت بامتياز وهلأ بتدرب في شركة
المنحوس: لساتني بشغلتي...اللي بشتغل فيه بشرب فيه

السنة 7: المسعود: أنا مدير الشركة الآن
المنحوس: لساتني بشغلتي...اللي بشتغل فيه بشرب فيه

السنة 25: صار المسعود المصدر والمستورد الأول في البلد وراح لعند المنحوس يشوفه. لاقى الحارة ممحية عن بكرة أبيها فاستغرب ووقف مذهول مو عارف ايش صار...

في الموعد المتفق عليه فجأة أجا عدد كبير من الناس لابسين بدلات بسيارات وحطو سجادة حمرا ووقفوا طابور يستنو.. أجت طيارة هلكوبتر ونزلت وفجأة نزل منها المنحوس!!!!

المسعود: يا زلمة أنت طول عمرك منحوس واللي بتشتغل فيه بتشرب فيه...ايش اللي غير حالك وصار حظك أحسن من حظي....!!!
المنحوس: ما انا بعت القناني...... ((قناني = جمع قنينة = bottles))

ما علينا، لو سمعتوا النكتة مني بتضحكوا ماية بالماية... بس لسوء الحظ مدري لحسن الحظ أني بكتبها كتابة فلا إلها فكاها ولا مازية..

[Mohammed]

Mohammed Yahya Abu Risha

July 1 at 6:23 PM ·

مسلسل النحس:
لما تكون مسلطن كمترجم وتتعب وتشتغل شغل ولا أحلى منو وتسلم ترجمو راقية وييجي العميل.....
بديش أحكي أيش العميل بيقول بس الصورتين هدول بوضحوا الفكرة
أمتعوا نظركم